NANG makaalis si Manong Berto, hindi mapalagay si Piolo. Napansin siya ni Jigo.
“Kinakabahan ka, Piolo?’’
“Medyo.’’
“Bakit?’’
“Tungkol kasi dun sa dalawang babae na sangkot dito sa misteryong ito.’’
‘‘’Yung sina Maria Celia at Mariz?’’
“Oo.’’
“Ano naman ang problema mo roon?’’
“Hindi ko alam kung sino sa kanila ang paniniwalaan ko. Litung-lito ako.’’
“Kasi nga naeengkanto ka kaya naguguluhan ka. Ganyan ang nangyari sa akin nang maengkanto – sirang-sira ang mga pagpapasya ko.’’
“Ano kaya ang mangyayari?’’
“Bukas pa natin malalaman ‘di ba dahil mamaya pang alas tres sisimulan ni Manong Berto ang pagbubudbod ng asin sa paligid ng balete.’’
“Sana magtagumpay si Manong.’’
“Magtatagumpay ‘yun. Relaks ka lang, Piolo.’’
Samantala, nang mga sandaling iyon ay naghahanda na si Manong Berto sa pagpunta sa Ayala Avenue na kinaroroonan ng balete. Kailangan bago mag-alas tres ng hapon ay naroon na siya.
Inihanda niya ang supot ng asin.
Pinagmasdan niya ang panahon. Maaliwalas.
Nang sumapit ang 2:30 p.m. umalis na siya.
Eksaktong 3:00 p.m. siya dumating.
Agad niyang binuksan ang supot na may lamang asin. Dumakot siya at binudbod sa paligid ng balete.
Matatapos na niyang budburan ang paligid nang maka-rinig siya ng ungol.
(Itutuloy)