Namataang misteryosong ‘hayop’ sa Poland na kinatakutan ng ilang araw, tinapay lang pala!
NOONG Abril 14. 2021, nakatanggap ang Krakow Animal Welfare Society ng tawag mula sa isang babae na may isang misteryosong “hayop” daw na namumugad sa isang puno na malapit sa isang residential area sa Krakow, Poland.
Ayon pa sa babae, ilang araw nang hindi nagbubukas ng bintana ang mga residente sa lugar na iyon dahil sa sobrang takot na baka makapasok ang misteryosong “hayop”.
Hinala ng babae, isang kakaibang specie ng Iguana ang namugad sa puno.
Agad na rumesponde ang mga taga-Krakow Animal Welfare Society kahit nagduda sila sa hinala ng babae dahil imposibleng manatili sa labas ang isang Iguana sa napakalamig na klima ng Poland.
Pagdating nila sa lugar kung saan namataan ng mga residente ang misteryosong “hayop”, nagtawanan sila nang makita ang nasa puno.
Isa lamang pala itong croissant, klase ng tinapay na pinauso ng mga Pranses.
Nakasabit ito sa isang sanga ng puno kaya napagkamalang exotic at mabangis na hayop.
Sa tingin ng mga rumesponde, may naghagis ng croissant mula sa isang high rise apartment para ipakain sa mga ibon ngunit sumabit sa isang puno.
Humingi ng paumanhin ang babaeng tumawag at nagreport tungkol sa misteryosong ‘‘hayop’’ at nangako ito na ibeberipika muna niya ang mga irereport sa mga awtoridad upang hindi mapahiya.
Nagpaalala ang Krakow Animal Welfare Society na kahit nauwi sa katatawanan ang pagrereport ng babaing tumawag sa kanilang hotline, hinihikayat pa rin nila na magreport pa rin sa kanilang organisasyon kapag may nakita sa paligid na may kinalaman sa animal welfare.
- Latest