EDITORYAL – Quarantine restrictions sa Metro Manila, huwag luwagan

DUMARAMI ang kaso ng COVID-19 sa Metro Manila kaya hindi pa dapat magluwag sa quarantine restrictions. Sa pinakabagong report ng Department of Health (DOH), nasa 513,619 ang kaso ng COVID sa bansa. Tumaas umano ang bilang ng kaso sa Metro Manila dahil sa selebrasyon ng Pasko at Bagong Taon.

Nakapagdudulot din ng pangamba ang pagpasok ng bagong variant ng COVID kung saan, 17 pa ang nagpositibo. Unang nakapasok sa bansa ang bagong variant nang isang lalaki na galing Dubai ang nagpositibo. Ilan sa mga kasama ng lalaki sa eroplano ang nagpositibo. Ayon sa report, magaling na ang lalaki. Ayon sa DOH, 12 ang nagpositibo sa Bontoc, Mountain Province. Kabilang sa mga ito ang dalawang OFWs na galing sa Lebanon noong Disyembre. Sinabi sa report na Disyembre 10 pa lamang ay mayroon nang nakapasok na variant sa bansa. Unang nadiskubre ang bagong variant sa United Kingdom noong Disyembre 2 at kumalat sa South Africa. Madali umanong makahawa ang new variant.

Nakapagtataka naman ang desisyon na pinapa­yagan nang palabasin ang mga bata. Nagpasya ang Inter-Agency Task Force for the Management of Emerging Infectious Diseases (IATF) na luwagan ang age res­trictions sa mga lugar na nasa modified general community quarantine. Ayon sa IATF, pinapayagan nang makalabas ng bahay ang edad 10 hanggang 65.

Isa sa mga dahilan ng IATF kaya nagdesisyong payagan nang makalabas ang mga bata ay para raw dumami ang mga customer sa mga malls, restaurant at nang makabangon na ang ekonomiya. Sa kasaluku­yan, ang mga nasa edad 15 hanggang 65-anyos lang ang pinapayagang lumabas.

Hindi pa napapanahon para magluwag sa Metro Manila. Maski si National Task Force against COVID-19 spokesman Restituto Padilla ay tutol na luwagan ang quarantine restrictions sa Metro Manila. Ayon kay Padilla dapat manatili sa kasalukuyang quarantine restrictions ang MM hanggang sa gumanda na ang datos­ ng mga kaso rito.

Maghigpit pa sa pagpapatupad ng health protocol lalo na sa Metro Manila. Noong Sabado sa Divisoria, Maynila, maraming namimili na walang face mask at face shield. Kung may face mask man, nakalabas ang ilong at ang iba nakalagay sa baba (chin). Sumunod sa ipinag-uutos para hindi na kumalat ang perwisyong virus at nang makabangon sa pagkakalugmok.