Hindi ako susuko (56)
SINUBUKAN ni Reagan ang kapatid na si Kennedy. Pinag-drowing niya ng magsasakang nakasakay sa kalabaw. Lapis lang ang pinagamit niya rito.
Habang gumagawa si Kennedy ay pinagmamasdan ni Reagan. Humanga si Reagan. May ibubuga si Kennedy. Nakikita na agad sa bawat bagsak ng lapis.
Nang matapos ang ginagawa ay pinakita ni Kennedy kay Reagan.
“Eto Kuya ang gawa ko.’’
“Galing ah! Mukhang mas mahusay ka pa sa akin.’’
“Hindi naman Kuya. Sa iyo nga ako hanga eh.’’
“Lagi kang magpraktis para lalo kang humusay.’’
“Oo Kuya.’’
“Tutulungan mo ako sa mga ginagawa kong bulaklak series. Ikaw ang magkukulay. Tingnan ko kung mahusay ka sa pagkukulay. Kailangan ay mabilis ang pagkukulay dahil mabilis matuyo. At dapat ay sure ang bagsak ng brush.’’
“Tatandaan ko Kuya.’’
“Sa Sabado, gagawa tayo. Kapag may nagawa tayo, dadalhin natin sa bayan sa Linggo para may kitain tayo.’’
“Sige Kuya. Kayang-kaya natin ‘yan!’’
Walang pasok kapag Sabado si Reagan kaya ‘yun ang araw para siya makapagguhit ng series ng mga bulaklak.
“Bougainvilla series ang tirahin natin Kennedy. Tiyak maraming bibili.’’
“Sige Kuya.’’
Nagtulong ang magkapatid sa pagguhit. Si Reagan ang nagdedesenyo at si Kennedy ang nagkukulay.
Bumilib si Reagan kay Kennedy, kuhang-kuha nito ang kulay. Parang propesyunal na kung gumawa.
Napangiti si Reagan, malaki rin ang pag-asa ni Kennedy sa larangan ng pagguhit.
Marami silang natapos na artwork ng araw na iyon.
“Bukas maaga tayong aalis, Kennedy para mabilis nating maibenta ang mga nagawa natin. Palagay ko marami ang makakagusto sa mga ito. Mahusay ang pagkakakulay mo --- parang totoong-totooo ang mga bougainvilla.’’
“Mahusay kasi ang pagkakadesenyo mo Kuya. Sinundan ko lang naman kung ano ang nakadesenyo.’’
“Pero mahusay ka na agad sa pagkukulay.’’
“Salamat Kuya. Siguro ay nasa dugo talaga natin ang pagiging artist.’’
“Oo nga.’’
KINABUKASAN, maagang umalis ang magkapatid patungong bayan dala ang kanilang artworks.
Tama ang mga sinabi ni Reagan na maraming makakagusto sa bougainvilla series nila.
Pinagkalipumpunan ng mga taong lumabas mula sa simbahan. Maraming humanga sa husay ng pagkakaguhit. Parang mga totoong bulaklak.
Iglap lang at naubos ang kanilang pinaghirapang iguhit.
(Itutuloy)
- Latest