Lalaki sa Nigeria, nagbenta ng litsong buwitre, inaresto!
PABORITO sa Nigeria ang litsong manok na tinatawag nilang suya.
Dahil mabenta ang suya, maraming tao roon ang nagnegosyo ng litsong manok. Bawat kanto ng kalsada ay may nagtitinda ng suya. Malakas itong pagkakitaan.
Pero may kakaibang naisip ang isang lalaki na taga-Onne, Port Harcourt. Sa halip na manok, litsong buwitre ang kanyang itininda.
Nambitag siya ng buwitre. Maraming buwitre sa kanilang lugar.
Pero sa kasamaang palad, nahuli siya ng mga residente habang kinukuha ang nabitag niyang mga buwitre. Mahigpit na ipinagbabawal ang paghuli ng mga buwitre roon dahil endangered na ang mga ito..
Tumawag ng pulis ang mga residente at dinala ito sa presinto. Nang tanungin ang lalaki, sinabi nitong gagamitin niya ang mga buwitre sa kanyang suya business.
Matagal na umano niyang ginagawa ang ganoon at wala namang nakapupuna sa litsong buwitre. Ayon sa lalaki, nasisiyahan pa umano ang mga customer niya.
Nahaharap sa kaso ang lalaki dahil sa paghuli sa mga buwitre.
Nagbabala naman ang mga awtoridad sa mga residente na maging mapanuri at baka ang suya na kanilang binili ay hindi manok kundi buwitre.
- Latest