Hindi ako susuko (13)
HINABOL pa ng tingin ni Reagan ang lalaki habang papalayo ito. Saka niya naisip na bakit hindi niya tinanong ang pangalan ng lalaki. Nakalimutan niya. Masyado kasi siyang excited sa offer ng lalaki na ipagdrowing niya. Saka tiningnan niya ang binigay na picture ng lalaki na siya niyang pagbabasehan ng lilikhaing portrait. Misis ng lalaki. Maganda ang babae.
Lalo pa siyang na-excite nang sabihin ng lalaki kanina na kahit daw magkano ay babayaran siya.
Napangiti si Reagan. Talaga yatang maganda ang mga artwork niya at mayroon nang nag-ooffer sa kanya. Mahusay ba talaga siya?
Nasa ganoong pag-iisip si Reagan nang may dumating na babae at tinanong kung magkano ang tinda niyang drowing ng lumang simbahan. Nag-iisa na ang tinda niya.
“Fifty po Mam.’’
Binayaran siya ng babae.
Ubos na naman ang mga tinda niya.
Bago umuwi, pumasok uli siya sa simbahan at nagpasalamat sa Diyos sa biyayang natanggap.
Pagdating niya sa bahay ikinuwento niya sa mga magulang ang tungkol sa lalaking nagpapadrowing.
‘‘Aba e talagang mahusay ka na nga, Reagan,” sabi ng tatay niya.
“Oo nga. Paghusayan mo pa,’’ sabi naman ng nanay niya.
Kinabukasan, sinimulan agad ni Reagan ang paggawa sa portrait. Kailangang paghusayan niya para hindi siya mapahiya.
(Itutuloy)
- Latest