Parang sinampal ang mga kritiko ng administrasyon

HINDI makapaniwala ang mga kritiko sa lumabas na ratings ni Pres. Rodrigo Duterte sa Pulse Asia survey kamakailan. Sa gitna kasi ng pandemya, pumalo sa 91% ang approval at trust rating ng Presidente.

Pero sabi ng mga kritiko, wala ‘yan! Kaya raw tumaas ang ratings ay dahil sa Social Amelioration Program (SAP).

Sa totoong buhay daw, kung pangangasiwa umano sa krisis ng COVID-19 ang pag-uusapan ay bagsak naman talaga ang admin.

Ayaw silang maniwala.

Ang lagay eh, parang iniinsulto ang pag-iisip ng mga nasa ibaba na naging sakop ng survey na ito. Nilalait ang estado ng kaisipan ng mga Pilipinong nasa Class D at Class E.  Eto raw kasi ang madaling suhulan.

Eto raw ‘yung lebel ng mga Pinoy na hindi na iniisip ang klase ng pangangasiwa ng pamahalaan basta ang importante ay may panuhol. Bakit ba raw kasi sa Class D at E ginawa ang survey?

Kung gagawin daw ang survey na ito sa mayayamang nasa Class A, B ay siguradong babagsak daw ang Presidente.

Kita mo nga naman ang estado ng kaisipan ng mga kritikong ito, hala bira! Eh kaso, ang pikon ay talo! Kasi naman, dapat magbago na sila ng estratehiya’t taktika! Lalo tuloy napapahiya.

Kung wala na kasing maipapakitang ibang alternatibo, magtrabaho na lang at bawasan ang ngawa.