EDITORYAL - ‘Bantay-salakay’

LAGANAP ang corruption sa maraming tangga-pan ng pamahalaan ngayon. At maski ang Natio-nal Bureau of Investigation (NBI) ay kabilang dito. May mga corrupt sa NBI at ang mga ito ang nagpapa-sama sa imahe ng kagawaran. Kinulapulan nila ng putik ang NBI at nagiging daan para hindi na pagkatiwalaan ng mamamayan. Imagine, kung sino ang mga naatasang mag-imbestiga e sila pala ang mga corrupt at tumatabo ng pera sa kanilang mga binibiktima.

Kamakalawa, inaresto ng mga kapwa NBI agents ang pinuno ng Legal Assistance Section na si Atty. Joshua Paul Capiral at kapatid nito at kinasuhan ng kasong graft. Nahuli sa entrapment operation si Capiral at kapatid habang inaabot ang P200,000 na hiningi sa isang Immigration official para hindi ito maisamang kasuhan.

Labingsiyam na Immigration personnel ang kinasuhan ng NBI dahil sa ‘‘pastillas’’ modus sa Ninoy Aquino International Airport (NAIA). Nadiskubre ang ‘‘pastillas’’ nang ibulgar ng whistleblower na si Allison Chiong na kaya madaling nakakapasok sa bansa ang mga Chinese na magtatrabaho sa Philippine Offshore and Gaming Operators (POGOs) ay dahil sa mga corrupt na tauhan at opisyal ng Immigration. Bawat Chinese umano ay hinihingan ng P20,000 para makapasok sa bansa. Nangyayari umano ang “pastillas”’ modus sa NAIA Terminal 1 at 3 mula pa noong 2016. Tinawag na “pastillas” ang modus ng mga corrupt na BI officials dahil ang perang ipinangsusuhol sa kanila ay binibilot na parang “pastillas’’.

Sinabi ni Justice Sec. Menardo Guevarra na ang pagkakaaresto sa abogadong si Capiral ay magsilbing babala sa iba pang corrupt officials. Hindi makali-ligtas sa batas ang mga gumagawa ng masama. Sabi naman ni Sen. Franklin Drilon na nakakahiya ang ginawa ni Capiral. Kung sino pa umano ang inatasang mag-imbestiga sa corruption ay ito pa ngayon ang sangkot sa katiwalian. Ayon kay Drilon, dapat i-disbar si Capiral. Ang mga katulad umano ni Capiral ang dahilan kaya nawawala ang tiwala ng mamamayan sa pamahalaan. Kahiya-hiya umano si Capiral sa legal profession, sabi ng senador.

Mabuti at nadiskubre ang ginagawa ni Capiral. Kung hindi nabuking ang kanyang panghihingi ng pera, magpapatuloy ito hanggang sa tuluyang madu­ngisan ang NBI. Parusahan si Capiral para hindi pamarisan. Sampolan ang “bantay-salakay’’!