Lalaki sa south Africa, arestado makaraang itago sa trunk ng kotse ang siyota upang makaiwas sa lockdown
MAHIGPIT na ipinatutupad ang lockdown sa Johannesburg, South Africa upang hindi kumalat ang coronavirus. Sa kasalukuyan, patuloy ang pagdami ng kaso ng COVID-19 sa nasabing lungsod dahil sa katigasan ng ulo ng mamamayan. Maraming inaaresto dahil sa paglabag sa regulasyon.
Kabilang sa inaresto ng mga pulis ang isang lalaki makaraang ilagay nito sa trunk ng kanyang kotse ang nobya para dalhin sa ibang lungsod.
Pinara ng mga pulis sa checkpoint ang kotse ng lalaki. Galing ng probinsiya ng Gauteng ang kotse. Ang Gauteng ang pinakamaraming tao sa South Africa, na halos katulad ng Johannesburg at may pinakamaraming kaso ng COVID-19.
Nang inspeksiyunin ng mga pulis ang trunk ng kotse, natambad sa kanila ang babaing nakahiga roon. Naka-jeans at T-shirt ang babae.
Tinulungan ng mga pulis ang babae na makababa.
Inamin ng lalaki na nobya niya ang babae at dadalhin niya sa kalapit na probinsiyang Mpumalanga.
Kinasuhan ng mga pulis ang lalaki at ang babae dahil sa paglabag sa lockdown regulations.
- Latest