Pasahero, sumabit sa tagiliran ng tren sa New York dahil sa ‘social distancing’

NASOBRAHAN ang pagsunod sa “social distan-cing” ng isang lalaking pasahero sa New York City na sa halip na sumakay sa loob ay sumabit ito sa tagiliran ng tren.

Makikita sa video na kumalat sa social media ang nakasabit na lalaki sa may bintana ng tren habang ito ay tumatakbo.

Mapapanood din sa video ang pakikipag-usap ng isa sa mga pasahero sa loob ng tren, na sinasabihan ang lalaki na huwag na huwag bibitaw.

Iniimbestigahan na ang pangyayari ng New York Police District, na nagpahayag na lubhang mapanganib ang ginawa ng lalaki at hindi ito nakakatulong sa sitwasyon sa New York City kung saan abalang-abala ang kapulisan sa pananatili ng kaayusan.

Malala ang naging pagtama ng epidemya ng coronavirus sa New York, kung saan mayroon nang 44,000 na kumpirmadong kaso at nasa 519 na ang namamatay.