EDITORYAL - Total ban na ang OFWs sa Kuwait

SINANG-AYUNAN na ni President Duterte ang lubusang pagpapatigil sa deployment ng overseas Filipino workers (OFWs) sa Kuwait. Salamat at nagdesisyon na ang Presidente. Ang desisyon ay kasunod sa resolusyon ng Philippine Overseas Employment Administration (POEA) na ipinatitigil na ang deployment ng overseas Filipino workers (OFWs) sa Kuwait. Lahat nang manggagawa ay hindi na papayagang makapasok sa Kuwait. Lahat nang uri at kategoriya ng manggagawa ay sakop sa malawakang deployment ban.

Ang total ban ay inisyu ng POEA base sa rekomendasyon ni Labor Secretary Silvestre Bello III, kasunod nang kalunus-lunos na pagpatay sa 26-anyos na domestic helper na si Jeanelyn Villavende. Binugbog hanggang sa mapatay si Jeanelyn ng kanyang amo noong Disyembre 26. Sa medico legal report, nakita ang pagkabasag ng bungo ni Jeanelyn. Ang mas nakakahilakbot, nakita rin ang palatandaan na ito ay ginahasa. Ang nakagagalit pa, hindi lumabas sa report ng Kuwait medico legal na ginahasa si Jeanelyn. Itinago pa ng Kuwait ang totoong nangyari. Ito ang dahilan kaya tuluyan nang itinigil ang pagpapadala ng mga manggagawa sa Kuwait.

Base sa direktiba ng POEA, ang lahat nang mga manggagawa na kasalukuyang nasa Kuwait ay tatapusin na lamang ang kontrata at pauuwiin na sila. Wala nang papayagan pang makabalik sa nasabing bansa, ayon sa direktiba.

Si Jeanelyn ang ikalawang Pinay na pinatay sa Kuwait noong 2019.

Noong Mayo 14, 2019, binugbog at napatay din ng kanyang amo si Constancia Dayag. Puro pasa ang katawan ni Dayag nang dalhin sa ospital. May nakita pang nakapasak na pipino sa ari ng kawawang Pinay. Hanggang ngayon, hindi pa nakakamit ni Dayag ang hustisya.

Noong 2018, pinatay din ng kanyang amo si Joanna Demafelis. Nadiskubre ang bangkay ni Demafelis sa isang freezer sa abandonadong apartment sa Kuwait. Pinatay siya sa sakal ng mga amo.

Itinigil ng Pilipinas ang deployment ng domestic helpers sa Kuwait dahil sa pangyayari kay Demafelis. Pero nangako ang Kuwait sa Pilipinas na puproteksiyunan ang mga Pinoy workers doon subalit isang malaking kasinungalingan sapagkat nagpatuloy ang pang-aabuso, panggagahasa, pambubugbog at pagpatay. Nararapat lang ang pagpapatigil sa pagpapadala ng workers sa Kuwait. Matitigil na rin ang kahayupang ginagawa ng mga Kuwaiti sa mga Pilipinong manggagawa.