Bagong world record: aso sa UK, nanganak ng 21 tuta

ISANG aso sa United Kingdom ang nakapagtala ng bagong world record matapos manganak ng 21 tuta.

Ipinagmalaki ni Joanne Hine ang kanyang Great Dane and American bulldog cross na si Mary Jane (MJ) nang ipanganak nito ang halos dalawang dosenang tuta.

Sinabihan ang taga-Isle of Man na si Joanne na nasa anim hanggang walong tuta lang ang ipinagbubuntis ni MJ pero nang papalapit na ang panganganak nito ay napag-alamang mas marami pa ang iluluwal nito.

Ang Guinness World Record para sa pinakamaraming tuta na ipinanganak ay 24 na naitala noong 2004. Kinailangan nga lang ipanganak ang nasabing bilang sa pamamagitan ng caesarian section samantalang ang panganganak ni MJ sa mga tuta ay pulos natural o normal – kaya naman para kay Joanne, nakapagtala ng bagong world record ang kanyang alaga.