32-anyos na lalaki sa india, arestado sa airport matapos magpanggap na 81-anyos

ARESTADO ang isang 32-anyos na lalaki sa India matapos hindi niya makumbinsi ang mga security officers  sa airport doon na 81-anyos na siya.

Huli si Jayesh Patel sa Delhi airport noong Lunes, matapos maghinala ang Central Industrial Security Force (CISF) sa boses niya at sa balat niyang wala man lang kulubot.

Patungo sana si Patel sa New York mula sa Indira Gandhi International Airport nang matunugan ng mga awtoridad ang kanyang modus. Nakasuot si Patel ng turban at ng makakapal na salamin. Nagpalago rin siya ng balbas na kinulayan ng puti upang magmukha siyang 81-anyos.

Napag-alamang ginawa ito lahat ni Patel upang makapunta at makapagtrabaho sa United States. Ayon sa imbestigasyon, nagbayad si Patel ng $42,000 (katumbas ng P2 milyon) sa ahenteng nag-ayos ng kanyang mga dokumento.

Ang ahen­te rin daw ang kumuha ng make-up artist upang tumugma ang itsura ni Patel sa taong nakasaad sa kanyang pekeng travel documents.