Dambuhalang ‘pi’ symbol, binuo ng mga taga-northern Ireland
NAKAPAGTALA ng bagong Guinness World Record ang isang eskuwelahan sa Northern Ireland matapos nilang buuin ang isang dambuhalang simbolo ng “pi”.
Ayon sa Lismore Comprehensive School sa Craigavon, County Armagh ay nasa 1,170 ng kanilang mga estudyante at faculty ang lumahok upang mabuo ang mathematical symbol sa labas ng kanilang eskuwelahan at mahigitan ang kasaluku-yang Guinness record na 847 katao na naitala sa Portugal noong isang taon.
Isinagawa ang record attempt kasabay ng “Pi Day” na ginugunita tuwing Marso 14. Katulad kasi ng petsa (3/14) ang unang tatlong numero ng “pi” na 3.14.
Ginawa rin ito ng eskuwelahan bilang pag-alala kay Maddy-Leigh Harbinson, 11, isa sa kanilang mag-aaral na binawian ng buhay dahil sa organ failure na dulot ng Type 1 diabetes. Dahil sa kanilang nagawa ay nakalikom sila ng donasyon para sa charity group na Diabetes U.K.
Balak ng mga opisyal ng paaralan na isumite sa Guinness World Records ang dokumentasyon ng kanilang world record attempt upang maging opisyal na ang kanilang naitalang record.
- Latest