Parrot mula uk na 4 na taon nang nawawala,marunong nang mag-Español nang matagpuan

ISANG British pet parrot na nagngangalang Nigel ang muling naibalik sa kanyang amo matapos mawala ng 4 na taon – ngunit ngayon, hindi lang Ingles ang binibigkas ng ibon dahil marunong na rin itong mag-Español.

Nawalay si Nigel sa kanyang amo na si Darren Chick nang lumipad ito palabas ng kanilang bahay sa California.

Isang pamilya pala na dating taga-Guatemala ang kumupkop kay Nigel kaya natuto ito ng Español.

Naibalik kay Chick ang kanyang alaga sa tulong ng isang beterinaryo na sinuri ang microchip na nakabaon sa parrot kung saan nakapaloob ang mga impormasyon tungkol sa ibon.

Bagama’t apat na taon na ang nakakaraan, hindi naman daw maitatanggi na ibon nga niya ang parrot na ibinalik sa kanya kahit pa noong una nilang muling pagkikita ay kinagat siya nito.