Libong kabataan, ipinagdiwang ang ‘araw ng putik’ sa Detroit

LIBU-LIBONG kabataan ang dumagsa sa isang parke sa Detroit, Michigan upang ipagdiwang ang “Mud Day” o “Araw ng Putik” na taun-taong ginugunita roon.

Isang hukay na may lawak na may 150 talampa-kang haba at 75 talampakang lapad ang ginawa sa Nankin Mills Park upang doon idaos ang selebrasyon ng Mud Day.

Pinuno ang hukay ng 2,000 gallon ng tubig at 200 toneladang lupa upang makapaglaro ang mga kalahok sa putikan.

Iba’t ibang mga palaro ang isinagawa para sa mga bata, kabilang na ang mga karera at hilaan ng lubid.

Bago matapos ang araw ay kinoranahan bilang Mud King ang tatlong taong gulang na si Charlie Daviskiba. Tinanghal namang Mud Queen ang apat na taong gulang na si Molly Kofahl. Napili ang dalawa dahil sila ang pinakamaputik sa lahat ng mga batang sumali sa kasiyahan.

Matapos ang selebrasyon ay dumating ang mga bumbero upang pasiritan ng tubig ang mga kabataan nang maalis ang putik na bumabalot sa kanilang mga katawan.