Gang war ng mga kabataan , nakaaalarma na!
RESPONDE - Gus Abelgas (Pang-masa) - February 14, 2018 - 12:00am

Nadadalas na naman ang mga nagaganap na riot o gang war ng mga kabataan sa mga lansangan at ang masaklap pa meron nang nagbubuwis ng buhay.

Tulad na lamang ng naganap sa Makati City sa mismong tapat pa ng paaralan kinuyog at sinaksak haggang sa mapatay ang isang high school student.

Sinasabing kalabang grupo na kinabibilangan din ng ilang menor de edad na kabataan ang sangkot sa krimen.

Kitang-kita sa kuha ng CCTV ang paglusob ng mga suspect malapit sa paaralan, kahit hindi kasali sa away, siyempre nagpanik na rin ang ibang mag-aaral.

Patay sa insidente si John Ernest Rivera, estudyante ng San Antonio High School.

Habang lima sa mga suspect ang naaresto na rin at tatlo sa mga ito ay pawang menor de edad.

Kuha sa CCTV, na talagang mga palaban ang mga kabataang ito, walang sinisino ang tatapang na akala mo ay mga bihasa ng kriminal.

Hindi lang naman sa Makati nasusumpungan ang ganitong mga gang war ng kabataan na madalas ngang maganap sa gabi.

Nakababahala na ang pagkakasangkot ng maraming kabataan sa kung anu-anong grupo o mga fraternity na walang naidudulot na buti sa kanila kundi lalo pang ikinapapahamak dahil ang lakad lamang ay makipag-away o makipaglaban sa katunggali nilang grupo.

Kaya nga may ilang lungsod katulad ng sa Quezon City ang nagpatupad ng curfew sa mga menor de edad.

Layunin nito na mapigilan ang mga menor de edad o mga kabataan na kumalat sa mga lansangan lalu na sa gabi kung saan nalalagay sa panganib ang kanilang buhay.

Malaking bagay ang mga pagtututok ng barangay lalu na nga ang mga kabataang hatinggabi na’y nasa lansangan pa, kahit walang ipinatutupad na curfew sa kanilang lugar, maaari rin naman nila itong masaway na huwag nang kumalat pa sa lansangan.

Pero siyempre pa, ang masinop na pagsubaybay mismo ng mga magulang sa kanilang mga anak ang mas kailangan.

Philstar
Facebook
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with