EDITORYAL - Talo ang gobyerno sa STL kaya dapat itigil

INILUNSAD ang Small Town Lottery (STL) noong 1987 sa layuning “patayin” ang jueteng. Pero sa halip na mamatay, lalo pang naging malala ang jueteng. Sa mga barangay sa buong bansa, hindi kumpleto ang buhay ng mga residente kung walang jueteng kaya naman balewala ang proyektong STL.

Isa sa mga dahilan kung bakit hindi mamatay ang jueteng ay dahil ang STL ang ginagawang front nito. Ang gambling lords lamang ang nakinabang at hindi ang gobyerno. Madaling dayain dahil magkapareho ang sistema ng paglalaro o pagbola ng STL at jueteng – dalawang kumbinasyon ng numero ang tatayaan.

Talo ang gobyerno sa STL. Sa halip na mapunta sa gobyerno ang kita ng STL, sa bulsa ng gambling lords bumabagsak. Dahil dito, bilyong piso ang natatalo sa gobyerno. Kaya ang suma total, maraming mahihirap ang hindi matulungan. Ang nakinabang lamang ay mga dupang na gambling lords.

Sa pagdinig ng Senado noong Miyerkules sa pamumuno ni Sen. Panfilo Lacson, natuklasang P48 bilyon bawat taon ang nalulugi sa gobyerno. Sabi ni Lacson, chairman ng Senate committee on games and amusement, na ang monthly income ng STL operations sa walong region sa Luzon ay nag-a-average ng P6.05 bilyon. Mas mataas ito kaysa monthly collection ng PCSO na P1.7 billion mula sa authorized agent corporations (AACs). Pinakamataas aniya ang collection sa Metro Manila. Sabi ni Lacson, may mali sa STL sapagkat ang gambling lords ang nakikinabang at hindi ang gobyerno. Ganunman, walang nirekomendang solusyon si Lacson kung paano mapapatigil ang gambling lords na ginagamit ang STL para sa operasyon ng jueteng.

Mas mabuti pa ang suspected gambling lord na si Charlie “Atong” Ang na nagbigay ng suhestiyon na dapat ang gobyerno na sa pamamagitan ng Philippine Charity Sweepstakes Office (PCSO) ang mag-operate ng STL. Kikita umano ang gobyerno ng P60 billion bawat taon kung ganito ang gagawin.

Puwedeng subukan ang payo ni Atong pero dapat munang itigil ngayon ang STL para hindi naman lubusang matalo ang gobyerno. At habang nakahinto ang STL, ituloy ng PNP ang pagtugis (kuno) sa jueteng lords.