EDITORYAL -Lihim na detention cell
PINAGKASYA ang 12 detainees sa isang sekretong selda sa Police Station 1 sa Tondo na may sukat na one meter by five meters. Walang bintana ang selda at wala rin umanong electric fan, ayon sa report. Ang nakadiskubre ay ang mga taga-Commission on Human Rights. Nagtungo ang CHR sa police stations at nakita ang miserableng kalagayan ng mga detainees na halos maligo sa pawis dahil sa sobrang init. May nag-iisang ihian ang selda. Ayon sa CHR, hindi sana nila mahahalata ang sekretong selda kung hindi pa may bumagsak. At napansin nila ang isang cabinet na nagsisilbi palang partisyon sa detention cell.
Kinondena ang ginawa ng mga pulis sa Station 1. Dahil sa pangyayari, agad na sinibak si Supt. Robert Domingo, station commander at 12 pulis na nasa anti-drugs unit. Sabi naman ni Domingo, nagsisilbing holding area ang masikip na lugar. Ang mga detai-nees umano ay nahuli lamang noong Huwebes dahil sa illegal drugs. Hindi pa raw gaanong nadedetine ang mga suspects.
Pero hindi pinaniwalaan ng CHR ang alibi ni Domingo. Matagal na umanong naka-detain ang mga suspect --- isang linggo na. Nalaman din nila na hinihingan ng mga pulis ng pera ang mga detainees para makalabas sa selda.
Tratuhin naman sana na tao ang mga detainees. Kahit nga ang aso ay nilalagay sa isang maayos na kulungan, ang tao pa kaya. Hindi sana ganito ang kalagayang pinararanas sa mga detainees sapagkat hindi pa naman sila nahahatulan.
Para masubukan kung paano tumira sa one meter by five meters na selda, bakit hindi ito gawin ni Domingo. I-try kung paano tiisin ng detainees ang makapugtong hiningang init, sangsang at angot ng sekretong selda. Kailangang maranasan niya ang hirap sa makipot at walang bintanang selda.
- Latest