Pera ng jueteng tukso rin!

MARIING ipinag-utos ni Pres. Rodrigo Duterte ang pagbuwag at pag-aresto sa mga operators ng sari-saring bawal na sugal sa bansa tulad ng jueteng, masiao at mga bookies sa bansa. Noong 2010, dalawang buwan pa lamang si dating Pres. Noynoy Aquino sa kanyang panunungkulan nang simulan ang kampanya laban sa iligal na mga sugal, katulong sa pagbubunyag si retired Archbishop Oscar Cruz na nagpalutang sa mga pangalan ng ilang gobernador, mayor, congressman, retired general at ilan pang matataas na pinuno ng bansa. Kahit ang senado ay nakialam na rin, pero nauwi rin sa wala ang imbestigasyon.

Matatandaan na noong panahon ng panunungkulan ni Gen. Alfredo Lim sa NBI, ipinatawag din ang jueteng operators sa kanyang tanggapan pero, wala ring nakulong isa man sa operators. May mga reports noon na nailalabas at naibebenta sa ibang bansa ang mga barya na nakokolekta ng jueteng at masiao kaya naalarma ang Central Bank dahil makaaapekto ito sa takbo ng multiplier effect sa merkado at ekonomiya at nagkakaroon ng krisis sa panukling barya.

Kamakailan, nag-operate ang PNP at nakahuli ng ilang kolektor ng jueteng at mga naglalaro ng cara y cruz. Napatawa tuloy ang mga sumusubaybay. Baka raw sa susunod ay mga naglalaro ng chess at dama sa bangketa ang hulihin nila para lang masabing may accomplishments sila. 

Nagdadalawang isip siguro ang mga loko na hulihin ang jueteng. Baka nga naman kumanta ang operators na nakikinabang din ang mga halal ng bayan at opisyales ng PNP kung dadalhin na naman sa Senado ang usapin, hehehe! 

Matanda nang  isyu ang jueteng, tupada at mga pergalan pero ito raw ang pinagkukunan nang maraming barangay kapitan ng intelehensiya at mga umuorbit na pulis pandagdag sa budget kaya nagpapatuloy ang mga ganitong ilegal na sugal kalsada. Siguro, huwag lang tanggapan ng pera ang mga illegal gambling operators, titigil na kusa ang mga yan lalo’t walang protektor!

BAKAS sa UNTv Radio 1350 KHz AMBand Sabado 5:00-7:00 p.m. www.untvradio.com.ph