Towing companies, tututukan!
Eto na, mukhang sa mga towing companies ngayon tututok ang pansin hindi lamang ng pamunuan ng MMDA kundi maging ng LTFRB.
Ito’y dahil na rin sa sangkaterbang sumbong na natanggap ng ahensya hinggil sa pagiging abuso ng karamihan sa mga ito kabilang na nga ang umano’y irregular towing operation.
May isa nang nasampolan ang MMDA, na inalis na nila sa listahan ng kanilang accredited towing companies dahil nga sa sumbong na iregularudad sa operasyon sa lungsod Quezon.
Sa pamamagitan ng isang resolusyon, pinatitigil na ng MMDA Legal and Legislative Staff operasyon ng Arcson Towing Services.
Hindi lang naman ngayon ang ganitong uri ng mga sumbong na bigla na lamang paghahatak ng mga sasakyan ng mga ito.
Kadalasan ay nag-aalok na rin ang mga ito nang areglo sa kanilang mga binibiktima lalo na sa mga agad-agad eh hinihila nilang mamahaling mga sasakyan.
Ilan pa nga reklamo sa mga ito, eh kapag humila o nanghila, walang mga pakunda-ngan sa sasakyan ng iba. Kahit bago at alaga ng may-ari ang sasakyan na mistulang ayaw magasgasan, sa kamay ng mga tauhan ng towing walang ingat-ingat kaya nga marami ang nagrereklamo na nawawasak ang kanilang mga sasakyan.
Magtataka pa ba tayo, nauna rito natuklasan din ng MMDA na ilan sa mga tauhan ng towing eh positibo sa paggamit ng droga.
Sa panig naman ng LTFRB, bubusiin naman nila kung may kaukulang franchise ang mga tow trucks na nag- ooperate sa bansa laluna sa Metro Manila.
Dumarami na rin umano ang sumbong nang pag -abuso ng ibang towing companies.
Bagamat may akreditasyon na umano sa MMDA at alinmang lokal na pamahalaan ang mga tow companies, dapat din palang kumuha ng franchise ang mga ito sa LTFRB.
Sinasabing ang lahat ng sasakyan na nangongolekta ng bayad mula sa publiko ay maikokonsiderang for-hire-vehicles na dapat na kumuha ng franchise sa ahensiya para makapag- operate.
Aantabayan natin kung paano ang gagawing pagpapatino sa ilang abusadong towing na ito na marami-rami na rin ang pinahirapan.
- Latest