Bus sa Canada, hinay-jack ng 9-anyos na batang lalaki

ISANG bus sa Saskatoon City, Canada ang muntik nang matangay matapos i-hijack ng isang 9-anyos na batang lalaki kamakailan.

Ang bata, na hindi na isinapubliko ang pangalan dahil sa kanyang pagiging menor de edad ay nakasuot pa ng pajama nang pasukin ang bus at patakbuhin ito.

Ayon sa mga nakasaksi, nagawang patakbuhin ng bata ang bus dahil iniwan ito ng driver na buhay ang makina. Hindi rin ikinandado ng driver ang pintuan ng bus kaya nagawang pasukin ng bata.

Natigil lamang ang ‘joyride’ ng bata nang bumangga ang bus sa isang truck at sa isang nakaparadang kotse. Wala namang nasaktan sa nangyaring banggaan ngunit nabasag ang windshield ng na-hijack na bus.

Agad namang rumesponde ang mga pulis sa pinangyarihan ng insidente. Aminado ang mga namamahala ng pampublikong transportasyon ng Saskatoon na may naging pagkukulang ang kanilang mga tsuper kaya ini­imbestigahan na nila kung sino dapat ang managot sa nangyari.

Wala namang plano ang mga pulis na sampahan ng kaso ang bata dahil sa pagiging menor de edad nito.