Trillanes, dismayado sa paghawak ni Chiz sa VP Sara trial

MANILA, Philippines — Ikinadismaya ni dating Senador Antonio Trillanes IV ang paghawak ni Senate Impeachment Court Presiding Officer Francis “Chiz” Escudero dahil sa mahigpit nitong pagpapatupad ng mga proseso sa impeachment trial ni Vice President Sara Duterte.

Sa press conference nitong Biyernes, iginiit ni Trillanes na nagpalabas si Escudero ng subpoena para sa lahat ng prosecution witnesses maliban sa kanya, kahit alam umano ng presiding officer na nasa Senado na siya at handang iharap bilang testigo.

“Meron bang ganyang power yung Impeachment Court? May power ba yung Presiding Officer, huwag muna ito. Ganito… yun ang tanong. They don’t have that power,”giit ng dating mambabatas.

“But just as I said, at the proper time we will deal with this people. Pero not at this time, kasi focus tayo sa mission natin. Let’s get that conviction done,” diin niya.

Sinabi rin ni Trillanes na hindi dapat sisihin ng publiko ang prosecution panel kung naging nakababagot ang impeachment trial.

“Yung mga senator-judges nakikita n’yo nakaupo lang, isa lang naman eh. Yung presiding officer lang naman yung nagti-timon. So kung boring yung impeachment trial it’s the fault entirely of the presiding officer,” ani Trillanes.

Napansin din ni Trillanes na tinatrato umano ni Escudero ang mga proseso ng impeachment na parang isang criminal court, gayong hindi naman ito isang criminal court.

Nauna rito, pormal na tinanggal ang pangalan ni Trillanes sa listahan ng mga testigong ihaharap ng House prosecution panel sa ilalim ng Article 2 ng Articles of Impeachment kamakalawa.