Mosyon ni VP Sara na pa-inhibit QC judge, ibinasura

MANILA, Philippines — Ibinasura ng Quezon City Regional Trial Court (RTC) Branch 98 ang mosyon ni Vice President Sara Duterte na mag-inhibit o kusang umatras sa kanyang grave threats cases si Presiding Judge Maria Angelica De Ramos.

Ayon sa kautusan ng korte na may petsang Setyembre 14, 2026, ibinasura ang hirit ni Duterte dahil sa kakulangan ng merito upang kuwestiyunin ang pagiging patas ng hukom at walang malinaw at kapani-paniwalang ebidensya ng aktuwal na bias o prejudgment.

Inihain ni Duterte ang motion for inhibition noong Setyembre 10, kung saan iginiit niyang tila tinulungan umano ng korte ang prosekusyon nang atasan itong magsumite ng digital evidence na hindi kasama sa unang isinumite nito.

Iginiit ni Duterte na magiging malaking pagkukulang ang hindi pagsama ng digital evidence dahil ang alegasyon ng prosekusyon na grave threats na ginawa sa pamamagitan ng live streaming services ay mawawalan umano ng batayan sa ebidensya.

Bukod dito, sinabi ni Duterte na dapat mag-inhibit ang hukom dahil siya at ang kanyang anak ay kapwa itinalaga ng Pangulong Ferdinand Marcos Jr. na political opponent ni Duterte.

Sinabi naman ng prosekusyon na ang mga dahilang inilahad para sa inhibition o recusal ay nag-ugat lamang sa hindi pabor na desisyon ng korte.

Una namang walang pagtutol si Duterte sa pagkakatalaga ng kanyang kaso sa nasabing korte.

Iginiit din ng prosekusyon na hindi maituturing na pagtulong ang direktiba ng korte na magsumite ng digital evidence.

Sinabi naman ng abogado ni Duterte na si  Atty. Paul Lawrence Lim na gagamitin nila ang lahat ng legal na remedyo matapos ibasura ng korte ang kanilang mosyon.

Nahaharap si Duterte ng tatlong counts ng kasong grave threats matapos magbantang ipapatay sina Pangulong Marcos, First Lady Liza Marcos at dating House Speaker Martin Romualdez.