Romualdez, kulong na sa New Quezon City Jail

MANILA, Philippines — Iniutos ng Sandiganbayan Third Division ang pagkulong kay dating Speaker Martin Romualdez sa New Quezon City Jail Male Dormitory sa Payatas, Quezon City.

Ito inihayag ni Associate Justice Karl Miranda kasunod nang pagtestigo sa korte si PGH Director Gerardo Legaspi na maaari nang palabasin si Romualdez anumang oras dahil stable na ang kanyang kondisyon matapos na suriin ng nasa 12 doktor at hindi na nito kailangang manatili sa isang acute care hospital.

Ayon sa PGH, hindi nakitaan ng atake sa puso ang dating Speaker, habang kontrolado naman ang iba pa niyang kondisyon kabilang ang diabetes at hypothy­roidism.

Subalit, kailangan pa rin umano ni Romualdez nang tuluy-tuloy na me­dical care, kabilang ang regular na blood pressure monito­ring, patuloy na pag-inom ng gamot at paggamit ng CPAP machine gabi-gabi kaugnay ng severe obstructive sleep apnea.

Kasalukuyang naka-confine si Romualdez sa PGH sa Maynila, kung saan siya inilipat mula sa Cardinal Santos Medical Center noong Setyembre 12 alinsunod sa utos ng Sandiganbayan.

Tiniyak naman ng abogado ni Romualdez na si Ade Fajardo na igagalang ng dating mambabatas ang desisyon ng korte at susundin ang proseso.

Si Romualdez ay nahaharap sa P7.4 bilyong plunder case na inihain ng Office of the Ombudsman kaugnay ng umano’y kickback scheme sa mga flood control project.