Oil price hike, nakaamba muli sa susunod na linggo

MANILA, Philippines — Muling nakaamba ang malaking taas-presyo sa mga produktong petrolyo sa darating na linggo, Setyembre 15.

Ito umano ay dulot ng nagpapatuloy na tensiyon sa pagitan ng Estados Unidos at Iran.

Sa pagtaya ni Jetti Petroleum president Leo Bellas, alinsunod sa unang apat na araw ng trading sa Mean of Platts Singapore (MOPS) at foreign exchange movements, ang presyo ng diesel ay posibleng tumaas ng P2.00 hanggang P2.50 kada litro habang ang gasoline ay posibleng tumaas ng P4.50 hanggang P5.00 kada litro.

Ang pinal na galaw at eksaktong halaga ng taas-presyo ay karaniwang inaanunsiyo ng mga kumpanya ng langis tuwing araw ng Lunes na ipapatupad ang bagong presyo kinabukasan, araw ng Martes.