Gibo kay VP Sara: Ipatanggal ang escorts kung walang tiwala

MANILA, Philippines — Kung wala nang tiwala sa Philippine National Police (PNP), Armed Forces of the Philippines (AFP) sa korte at maging sa kaniyang security team ay maaaring ipatanggal na ni Vice President Sara Duterte anumang oras ang kanyang mga security escorts.

Ito ang sinabi ni Defense Secretary Gilberto Teodoro Jr., na prerogatibo ni VP Duterte kung ayaw na nito sa kaniyang mga security detail na binubuo ng halos 400 na karamihan ay mga sundalo.

Ito ang reaksyon ni Teodoro sa sinabi ni VP Sara noong Setyembre 5 matapos itong magkomento hinggil sa isyu nang maglagak ng P360,000 piyansa sa Quezon City Regional Trial Court (RTC) kaugnay ng inisyung warrant of arrest laban sa kaniya sa tatlong counts ng grave threats.

Ayon kay Teodoro karapatan ni VP Sara na hilingin na i-withdraw ang mga security escorts nitong mga sundalo anumang oras kung kaniyang nais.

Nilinaw naman ng Kalihim na wala pa siyang natatanggap na kahilingan kay VP Sara para i-withdraw ang kaniyang mga escort na mga sundalo.

Inihayag pa ni Teodoro na bahala na si VP Sara na magdesisyon kung sino ang gusto niyang manati­ling security escorts niya o kung tuluyan na niya itong alisin.