Katagang ‘abogadong walang alam,’ ipinatanggal sa record ng impeachment court

MANILA, Philippines — Ipinatanggal ni Atty. Shiela Sison ng defense team sa record ng impeachment court ang pahayag ni private prosecutor Atty. Benjamin Tolosa Jr., ang katagang “abogadong walang alam.”

Sa ika-21 araw ng impeachment trial, iniharap ng prosekusyon si Atty. Michael Poa, spokesperson at defense counsel na idineklarang hostile witness dahil bahagi siya ng depense team ni Vice President Sara Duterte.

“The Vice President chose him (Atty. Michael Poa) – the man who knew nothing – to answer the auditors.Sa kabila noon, siya ang inatasan ng bise presidenteng sumagot sa COA (Commission on Audit).Hindi ang SDO (Special Disbursing Officer), hindi ang nag-disburse ng pera,hindi ang tumanggap ng pera,ang abogadong walang alam,” pahayag ni Tolosa.

Agad na hiniling ni Sison na tanggalin ang sinabi ni Tolosa na “abogadong walang alam” at iginiit na hindi ito “proper” na salita sa loob man o sa labas ng korte.

Sinabi ni Tolosa, hindi niya intensyong insultuhin si Poa at ipinaliwanag niya na kaya niya nasabing ang katagang “abogadong walang alam” ay dahil paulit-ulit na sinabi ni Poa sa pagdinig sa Kamara noong 2024 na wala siyang alam paggamit ng confidential funds ng Department of Education gayong siya ang inatasan ng Bise Presidente sa audit observation memorandum (AOM) ng COA.

Nag-sorry rin si Tolosa kay Poa kung na-offend niya ito.

Sa ruling ni Presiding Officer Sen.Francis “Chiz” Escudero, pinatatanggal niya sa record ng impeachment court ang nasabing kataga ni Toloso.

Pinaalalahanan din ni Escudero ang mga abogado ng dalawang panig na huwag gumamit ng mga ganoong uri ng salita sa kapwa abogado.