2 opisyal ng LTO na nanakit, sinibak sa serbisyo
MANILA, Philippines — Sinibak sa serbisyo ni Department of Transportation (DOTr) Secretary Vince Dizon ang dalawang opisyal ng Land Transportation Office (LTO) Region 2 matapos ang ginawa nilang pananakit sa dalawang indibidwal na kinabibilangan ng isang menor-de-edad naganap sa Pulsar Hotel, Barangay Caggay, Tuguegarao City, Cagayan.
Kinilala ni Dizon ang mga sinibak na sina LTO Region II assistant regional director Manuel Baricaua at Charles Ursulum.
Ayon kay Dizon, lumiham na siya kay Executive Secretary Lucas Bersamin para permanente nang matanggal sa serbisyo ang mga naturang opisyal.
Nabatid na ang dalawang opisyal ay nahuli sa video na sinusuntok at sinisipa ang isang lalaki sa isang aktibidad sa Tuguegarao, Cagayan.
“No excuse para dito. Tinanong ako, ‘Sir, kailangan pa ba ng imbestigasyon?’ Sabi ko, ‘Anong imbestigasyon pa ba kailangan mo? Kitang-kita mo na nga sa video na tinadyakan ‘yung mga kababayan natin”, wika ni Dizon.
- Latest
