Giyera kontra illegal drugs palalakasin sa komunidad – Marcos

MANILA, Philippines — Upang tuluyan na umanong masawata ang pagkalat ng illegal drugs ay muli itong palalakasin ng pamahalaan sa pamamagitan nang paggalugad sa mga kalye at eskinita sa bansa.

Ito ang inihayag ni Pangulong Ferdinand Marcos Jr., sa podcast interview dahil ito ang daing ng taumbayan na talamak na naman ang street level operations ng droga sa bansa.

Paliwanag ni Pa­ngulong Marcos, tumutok sila sa malalaking sindikato at drug bust operations nitong mga nakaraang taon, subalit lumakas naman ang bentahan sa mga maliliit na lansangan.

Kaya muling palalakasin aniya ang operasyon laban sa mga pusher, at magiging bahagi na rin aniya ng pagpapatrulya ng mga pulis ang pagbabantay laban sa mga tulak ng illegal na droga sa mga komunidad.

Mahigpit naman ang bilin ng presidente sa mga otoridad na lumayo sa lumang sistema na nauuwi ang operasyon sa mga pagpatay  sa mga hinihinalang tulak o suspek, sa halip ay ipatupad ang due process.

Inamin naman ni Marcos na mahirap masawata ang droga sa bansa, lalo na at malaking pera ang pinapagalaw dito.

Maging ang mga pulis aniya, mga lokal na pamahalaan at mga huwes ay nabibili nito, kaya naman patuloy nilang nilalabanan at binubuwag ang mga sindikato ng droga sa bansa.