Motorsiklo vs truck: 3 obrero, utas

MANILA, Philippines — Isang motorcycle driver at dalawa nitong backrider ang nasawi makaraang aksidenteng sumalpok sa kasalubong na truck ang sinasakyan nilang motorsiklo sa Cabanyohan Crossing, Brg. Tampalon, Kabankalan City, Negros Occidental.

Kinilala ang mga nasawing biktima na sina Robin Causapin, 19; Jomel Hamaybay, 21 at Rico Ian Samanero, 26; pawang mga obrero ng Brgy. Tampalon ng lungsod.

Batay sa ulat ang insidente ay naganap sa kahabaan ng nasabing highway, alas-9:40 ng gabi noong Sabado.

Sa imbestigasyon, kasalukuyang minamaheno ni Samanero ang kaniyang Rusi motorcycle kaangkas sina Causapin at Hamaybay pauwi sa kanilang tahanan nang aksidenteng sumalpok ito sa kasalubong na truck na minamaneho ni Gerardo Makilan III, 40 ng Brgy, Locotan ng nabanggit ding siyudad.

Lumilitaw sa imbestigasyon na ang mga biktima ay pawang nasa impluwensiya ng alak nang mangyari ang insidente.