P20 rice program ng DA pinalawak sa maraming KADIWA centers
MANILA, Philippines — Bilang katuparan sa pangako ni Pangulong Ferdinand Marcos Jr. na gawing abot-kaya ang pagkain sa mas maraming bilang ng mga Pilipino ay pinalawak ng Department of Agriculture (DA) ang P20 per/kilo rice program sa mas maraming KADIWA centers.
Matapos ilunsad ang subsidized rice program sa 12 KADIWA centers noong Martes, isang araw matapos ang May 12 midterm elections, dalawampung dagdag na centers ang binuksan sa Metro Manila, Bulacan,Cavite, Laguna, Mindoro at Rizal at nagsimulang magbenta ng P20 per kilo ng bigas nitong Huwebes.
Sa kasalukuyan, ang mga benepisyaryo ng P20 rice program ay pinapayagang makabili ng hanggang 30 kilo ng bigas kada buwan.
Ang bigas na ibinebenta sa KADIWA centers ay mula sa National Food Authority (NFA) na bumibili ng palay sa mga lokal na magsasaka sa presyong mas mataas kaysa sa mga pribadong trader at tinitiyak ang mas magandang kita para sa mga magsasaka.
Karamihan sa mga KADIWA center ay bukas na ng alas-6:00 ng umaga hanggang alas-2:00 ng hapon, Huwebes hanggang Sabado.
- Latest
