2 poll watcher na nag-shade ng balota kakasuhan ng Comelec

MANILA, Philippines — Sinibak na ay mahaharap pa sa kaso ang dalawang election ­watchers na naaktuhan sa isang video na siyang nagsi-shade ng balota ng mga botante sa isang ­polling precinct sa Abra, sa kasagsagan ng halalan para sa May 12 midterm polls kahapon.

Ayon kay Commission on Elections ­(Comelec) Chairman George Erwin Garcia ­nakarating sa kanilang kaalaman na isang Facebook ­video kung saan makikita ang dalawang election ­watchers, na isang lalaki at isang babae, habang siyang nagsi-shade ng balota ng mga botante.

Sa nag-viral na video na ipinaskil sa Facebook ng isang Joy Bernos, maririnig ang isang babae na nagre-report hinggil sa insidente.

Kahit naman nagre-report na ang babae at ibini-video ang insidente ay tuloy pa rin ang mga naturang poll watchers sa pag-shade sa balota ng mga botante.

Iniulat din naman nito ang presensiya ng election paraphernalia sa loob ng voting precinct na makikita siyang kinukopya sa pagboto.