Bong Go, isinulong reporma sa mental health

MANILA, Philippines — Muling itinulak ni Senator Christopher “Bong” Go ang pangangailangang unahin ang mga reporma sa kalusugan ng isip kasunod ng 2024 Mental State of the World Report, na nagsiwalat ng malaking pagbaba sa mental health quotient (MHQ) ng Pilipinas—mula 78.44 noong 2023 hanggang 68.76 ngayong taon.

Habang ang marka ng bansa ay nananatiling higit sa global average na 62.84, ang pagbaba ay nagpapakita ng tinatawag ni Go na “urgent emergency”, partikular sa kabataang Pilipino.

Ang panukalang batas, kung maipapasa, ay nag-uutos sa paglikha ng mga espasyo sa loob ng mga uni­bersidad at kolehiyo ng estado kung saan maa-access ang libreng pagpapayo at sikolohikal na serbisyo. Hahawakan ito ng mga sinanay na propesyonal. 

Nagmumungkahi rin ito ng 24/7 hotlines upang matiyak na ang mga estudyanteng balisa ay mabibigyan ng tulong anumang oras, kahit saan.

Ang adbokasiyang ito ni Go ay sa gitna ng nakababahalang data mula sa Sapien Labs, isang nonprofit na nakabase sa Washington D.C., na nagpakita na ang MHQ ng young Filipino adult na nasa edad 18 hanggang 24 ay bumagsak sa 24.9—nakategorya sa ilalim ng “enduring”, isang hakbang na lamang sa pinakamababang klasipikasyon na “struggling”.

Sa Pilipinas, matingkad ang kaibahan ng mga henerasyon. Habang ang grupong 18–24 ay nagtala ng MHQ na 24.9, ang mga may edad na 55 hanggang 64 ay nakakuha ng 110.6, may 65–74 na bracket na mas mataas pa sa 115.5—na naglalagay sa kanila sa kategoryang “succeeding”, o kabilang sa mga pinakanababanat sa pag-iisip sa buong mundo.