Turistang Koreano nanlaban sa holdap, utas
MANILA, Philippines — Isang Korean national ang nasawi matapos na pagbabarilin ng riding-in- tandem na mga holdaper nang ito ay nanlaban naganap sa Korean Town sa Brgy. Anonas, Angeles City, Pampanga nitong Linggo ng Pagkabuhay.
Sa report ni Angeles City Police Director P/Col. Joselito Villarosa Jr., kinilala ang nasawing biktima sa apelyido lamang nitong Kim.
Ayon kay Villarosa, naitala ang krimen sa kahabaan ng Fil-Am Friendship highway, Korean Town, Brgy, Anonas ng lungsod bandang ala-1:50 ng hapon.
Base sa imbestigasyon ang biktima ay nakatayo sa harapan ng isang bangko sa lugar nang lapitan ng dalawang riding-in-tandem na holdaper na lulan ng Yamaha Nmax motorcycle.
Agad na nagdeklara ng holdap ang backrider pero pumalag ang biktima habang hinahablot ang kaniyang bag kaya binaril ito ng suspect na nasapul sa kaniyang katawan.
Mabilis na nagsitakas ang mga holdaper matapos na duguang bumulagta ang Koreano na bagaman nagawa pang maisugod sa pagamutan ay idineklara na itong dead-on-arrival.
- Latest
