Pro Marcos mas marami kaysa Duterte

MANILA, Philippines — Mas nakararaming Pinoy umano ang nakasuporta sa administrasyong Marcos kumpara sa mga Duterte at kanilang mga kaalyado sa politika.

Ito ang lumitaw sa pinakahuling Tugon ng Masa (TNM) survey na isinagawa ng OCTA Research noong nakaraang buwan.

Batay sa naturang survey, 36% ng adult Filipinos ang sumusuporta sa administrasyon ni Pang. Ferdinand Marcos Jr. habang 18% lamang ang pro-Duterte.

Samantala, mayroon namang kabuuang 26% ang nagsabi na wala silang sinusuportahan sa dalawang kampo; 12% ang tumangging sumagot o hindi alam ang sagot sa tanong at walong porsiyento ang nagsabing nakasuporta sila sa oposisyon.

Nabatid na ang bilang ng Marcos’ supporters ay bumaba ng dalawang puntos mula sa August 2024 report habang bumaba rin ng tatlong puntos ang mga supporters ng mga Duterte.

Sa kabila nito, sinabi ng OCTA na ang naturang numero para sa mga tagasuporta ng mga Marcos at Duterte ay itinuturing nilang ‘statistically unchanged’ mula sa 3rd Quarter TNM survey noong Agosto 2024 dahil sa margin of error nito.