Lady rider nabangga; nagulungan ng dump truck

MANILA, Philippines — Agad namatay ang isang babaeng rider nang mabangga at magulungan ng dump truck sa kahabaan ng Roxas Boulevard sa harapang bahagi ng Palacio De Manila, Malate, Manila, kahapon.

Kinilala ang biktima na si Angelica Mojica, 21-anyos, nakatira sa Purok 2 ng Barangay Asisan, Tagaytay City.

Nasa kustodiya naman ng MPD-Traffic Enforcement Unit ang suspek na si Sherwin Darl Q. Laaro, 27-anyos, ng Bubulang Malaki, San Indefonso, Bulacan.

Sa imbestigasyon, alas-6:00 ng umaga ay kapwa binabaybay ng biktima sakay ng kanyang Honda Click motorcycle na my plakang D3 99SN at suspek na minamaneho naman ang Howo dump truck (NAR 1414) ang southbound lane ng ­Roxas Boulevard partikular sa harap ng Palacio De Manila, Malate, Manila nang sila ay magbanggan.

Sa lakas ng pagkakabangga, bumagsak ang biktima at nagulungan pa ng dump truck dahilan para magtamo ng matinding pinsala sa ulo na agad niyang ikinasawi.