Anak tinopak minartilyo ng ama, todas

MANILA, Philippines — Namatay noon din ang isang 26-anyos na babae na may sakit sa pag-iisip matapos hatawin ng martilyo ng kanyang sariling ama nang manakit ito sa loob ng kanilang tahanan, kamakalawa ng umaga sa Barangay San Vicente, San Narciso, Quezon.

Kinilala ang nasawing biktima na si Imelda Cataga Baraquiel, na umano’y nakakaranas ng “mental disorder”.

Agad namang naaresto ng otoridad ang amang suspek na nahaharap sa reklamong “parricide” na si alyas “Salvador”, 53, balo, isang magsasaka at residente ng Sitio Lomboy, Brgy. San Vicente, San Narcisio, Quezon.

Ayon sa salaysay sa pulisya ni Rosie Francisco, pinsan at kapitbahay ng biktima, alas-6:00 ng umaga nitong Martes nang marinig niyang sumisigaw si Imelda at hinihinalang inaatake muli ng kanyang sakit sa pag-iisip.

Habang umaatake ang sakit ay nawalan umano ng kontrol sa sarili ang biktima at pinagtangkaan umano nitong patayin ang kanyang amang si Salvador.

Bunsod nito, dumampot naman ng martilyo si Salvador at pinaghahataw sa ulo at braso ang anak na agad nitong ikinamatay.