Subpoena sa murder charges vs Teves, inilabas ng DOJ
MANILA, Philippines — Naglabas na ang Department of Justice (DOJ) panel of prosecutors ng isang subpoena para sagutin ang mga reklamong ‘multiple murder, multiple frustrated murder, at multiple attempted murder’ na isinampa laban kay suspended Negros Oriental 3rd District Rep. Arnolfo “Arnie” Teves Jr. sa kaniya noong Marso 4, kaugnay ng pagpaslang kay Gov. Roel Degamo at siyam na iba pa.
Ito ang sinabi ni Senior Deputy State Prosecutor Richard Anthony D. Fadullon na kung saan ay nananatiling nasa ibang bansa pa rin si Teves at nasa ikalawang 60-araw na suspensyon na niya bilang kinatawan ng Negros Oriental.
Patuloy nitong ikinakatwiran ang banta sa kaniyang kaligtasan kaya hindi siya bumabalik ng Pilipinas.
Isinampa ang naturang mga reklamo laban sa kaniya makaraang ituro siya na isa sa mastermind sa asasinasyon kay Degamo kung saan siyam na iba pa ang nasawi at nasa 18 ang sugatan.
Sinampahan si Teves ng National Bureau of Investigation (NBI) noong Mayo 17, 2023 ng mga kasong 10 bilang ng murder, 14 bilang ng frustrated murder, at apat na bilang ng attempted sa ilalim ng Revised Penal Code (RPC).
Bukod kay Teves, kasama ring sinampahan ng kaso sina Angelo V. Palagtiw, Neil Andrew Go, Capt. Lloyd Cruz Garcia, Nigel Electona, at isang indibidwal na may alyas na “Gee-Ann” at “Jie-An,” na kapatid umano ni Palagtiw.
- Latest