7 kotongerong pulis-Pampanga, sinibak
MANILA, Philippines — Pitong pulis kabilang ang hepe ng Police Station 2 ng Angeles City Police, Pampanga ang tinanggal sa puwesto dahil sa umano’y ilegal na pag-aresto at pangingikil sa 13 preso na nakakulong dito.
Kinilala ang mga suspek na sina PMaj. Marvin Aquino, Station Commander; PMSg Romulo G Meligrito-Intelligence/DEU; PSSg Nikko Dave V Marquez-Investigation/Jailer/Desk Officer; PSSg Mark Steven C Sison- Investigation /Jailer/Desk Officer; PCpl Richard R Gozum-Intelligence / DEU; PCpl Diosdado Buenconsejo Villamor Jr-Intelligence/DEU; PCpl Jaypee N Mangilit-Intelligence/DEU; at sibilyang si Esmael B Arviola na nagsisilbing asset ng pulis na nahaharap sa kasong illegal possession ng Cal.38 Revolver na may apat na live ammunitions.
Sa report ni Philippine National Police Integrity Monitoring and Enforcement Group (PNP-IMEG) Director BGen. Warren De Leon kay PNP chief Gen. Benjamin Acorda, Jr., Biyernes, alas 3:45 ng hapon nang nagsagawa ng surprise inspection ang IMEG katuwang ang IMEG- Luzon Field Unit (Lead Unit), IMEG-Counter Intelligence Division; 3SAB, 35SAC, 2SAB, 22SAC, Angeles City Internal Affairs Service (IAS) at Angeles City Police Office sa Police Station 2, Angeles City Police Office.
Nakatanggap ng impormasyon ang mga otoridad na may mga inaaresto at ikinukulong sa naturang police station at hinihingan pa umano ng pera ng mga tauhan nito na walang isinampa kaso.
Hinihingan umano ng mga pulis ng P30,000 ang bawat preso, kapalit ng hindi pagsasampa ng kaso paglabag sa RA9165.
“Bakit mo aarestuhin ang isang tao tapos hindi mo [sasampahan] ng kaso? Nakadetain lang doon eh anong inaantay nila? Areglo! At walang mai-explain kung bakit walang mai-file na kaso,” ani De Leon.
Dahil dito, nakatakdang magsasagawa ng mga inspeksyon ang PNP sa lahat ng mga custodial facility nito sa buong Pilipinas upang maiwasang maulit ang nangyari sa Angeles City.
Dinala na sa National Headquarters ang 7 naarestong pulis at mahaharap sa reklamong arbitrary detention at unlawful arrest.
- Latest
