248 Pinoy apektado sa Turkey quake
MANILA, Philippines — Inihayag kahapon ni Ambassador Maria Elena Algabre na nasa 248 Pinoy ang apektado ng magnitude 7.8 na lindol sa Turkey, subalit sa kasalukuyan wala pang naitatalang nasasawi.
“Ang mga Pilipino na 248 na nasa region na ‘yun ay apektado kasi po marami pong building ang nasalanta, walang electricity, malamig, umuulan,” wika ni Algabre.
Sa huling ulat ng mga otoridad, nasa 3,700 na ang nasawi sa naganap sa lindol sa Turkey at Syria.
Maliban dito, sinabi ni Algabre na mayroong 78 aftershocks ang naitala na ang iba ay kasinlakas pa ng naunang lindol.
Ipinakalat na ang nasa 9,000 search and rescue personnel sa mga lugar na apektado ng lindol kasabay ng pagbibigay ng pamahalaan ng Turkey ng nasa 300,000 kumot at mobile kitchen para umalalay sa mga biktima.
Nauna nang nagparating ng pakikiramay ang pamahalaan sa pamilya ng mga nasawi sa lindol sa Turkey at Syria kasunod ng pagsasabing handang tumulong ang bansa sa mga biktima.
- Latest
