Kelot todas, 1 pa kritikal sa tandem
MANILA, Philippines — Idineklarang dead on arrival sa ospital ang isang lalaki habang ang kasama nito ay nasa kritikal na kalagayan matapos pagbabarilin ng dalawang lalaki na sakay ng motorsiklo kahapon sa Los Baños City, Laguna.
Kinilala ang nasawi na si Saidamen Ampawa, na nagtamo ng mga tama ng bala sa iba’t ibang bahagi ng katawan habang ang kasama nito na si Macabangon Manuco ay nasa kritikal na kalagayan.
Nakilala ng mga otoridad ang dalawang suspek na isang Lagusak Anowar Bandara at Janal Ameril na mabilis na tumakas sakay ng motorsiklo.
Batay sa imbestigasyon, alas-12:30 ng tanghali ay nakahandang makipagkita ang mga biktima kay Ameril sa harap ng isang mini-stop store na matatagpuan sa Brgy. Batong Malake upang ayusin ang kasong R.A 9262, o violence against women and their children.
Habang sakay ang mga biktima ng puting Toyota Innova (NCO-5237) ay nilapitan sila ng mga suspek at pinagbabaril si Ampawa na nakaupo sa driver seat habang si Manuco ay nakaupo sa likod.
Nang masigurong nadale ang mga biktima ay tumakas ang dalawang suspek sakay ng motorsiklo.
Nabatid sa mga barangay officials na ang mga biktima at suspek ay may matagal nang alitan at may nakapending na kaso kabilang ang tungkol sa relihiyon.
- Latest