Store sa Quezon City tumanggap ng sibuyas bilang bayad
MANILA, Philippines — Isang Japanese store sa Quezon City ang dinagsa ng mga mamimili matapos itong tumanggap ng sibuyas bilang bayad sa ilan nilang piling paninda sa loob ng isang araw.
Dahil na rin sa napakamahal na sibuyas, binuksan ng Japan Home Centre sa Panay ang kanilang store sa mga mamimili para sa palit-sibuyas na items.
Nabatid na pinilahan ng mga mamimili ang main branch ng naturang store nitong Sabado upang bumili ng ilang piling items na maaaring bayaran ng sibuyas kabilang dito ay ang mga cooking pans, cleaning solutions, at iba’t ibang home products na nagkakahalaga ng hanggang P88.
Nabatid na ang bawat produkto ay may katumbas lamang na isang sibuyas.
Bawat mamimili naman ay maaari lang bumili ng hanggang tatlong item o magbayad ng hanggang tatlong sibuyas.
Ayon kay Japan Home Centre Marketing Officer Mitzi Gamboa, ang event ay nagtagal ng hanggang alas-8:00 ng gabi nitong Sabado lamang. Aniya, ang mga sibuyas na nakolekta nila ay gagamitin nila sa community pantry na itatayo sa tapat ng tindahan sa Pebrero 8.
- Latest
