10-14 anyos dalagita na nabubuntis dumarami - POPCOM
MANILA, Philippines — Naalarma ang Commission on Population and Development (POPCOM) sa pagdami ng mga nagdadalaga na nasa 10-14 anyos ang nabubuntis sa bansa.
Ito ang inilahad ni POPCOM Executive Director Lisa Grace Bersales sa kaniyang pagharap kamakalawa sa House Committee on Youth and Sports Development na pinamumunuan ni 5th District Rep. Faustino Michael Carlos Dy.
Hinikayat ni Bersales ang pamahalaan na umaksyon upang mabawasan ang pagbubuntis ng mga nagdadalaga o teenage group.
Base sa data ng Civil Registry of Statistics ng Philippines Statistics Authority (PSA), sinabi ni Bersales na nasa 2,113 ang mga ipinanganak na sanggol sa nasabing age group noong 2020.
Habang sa data ng Department of Health (DOH), nasa 2,534 mga kabataang Pilipina na nasa 10-14 taong gulang ang nanganak noong 2020 kung saan nasa 2, 299 naman noong 2021.
Sa pahayag naman ni Jelie Barceta ng Department of Social Welfare and Development (DSWD) Social Technology Bureau na noong 2019 ay nasa 2,411 mga menor de edad na nasa 10-14 anyos ang nabuntis at nanganak.
Nasa 133,000 mga menor de edad na ang nagkapamilya noong 2021 kabilang ang nagkakaedad ng 10 hanggang 19 taong gulang.
- Latest