‘Di magkakaroon ng recession sa Pinas — Marcos
MANILA, Philippines — Malaki ang paniwala ni Pangulong Ferdinand Marcos Jr. na hindi makararanas ng recession sa Pilipinas.
Ito ay kasunod ng ulat ng pagbaba ng bilang ng mga unemployed o walang trabahong Pilipino sa bansa.
Binigyang-diin ng Punong Ehekutibo na prayoridad ng kanyang administrasyon ang makalikha ng hanapbuhay para sa mga Pilipino simula pa ng magsimula ang kanyang liderato.
“Ang balita na tumaas ang inflation rate na hanggang eight percent last November, mayroon naman kasabay na mas magandang balita na bumaba ang unemployment rate sa four and a half percent mula sa five percent,” ayon kay Pangulong Marcos.
“Kaya’t kahit papaano ay malakas ang loob natin na hindi tayo magkakaroon ng recession dito sa Pilipinas dahil masyadong mababa ang unemployment rate at kung maaalala ninyo sa pagsimula namin dito sa administrasyong ito ay pinag-usapan na namin ay trabaho talaga ang aming uunahin. Kaya’t ‘yan ang nakikita ngayon natin na nangyayari. Ipagpatuloy lang natin ‘yan,” dagdag na pahayag nito.
Sinabi ng Chief Executive na bagama’t may pagtaas sa inflation rate na umabot ng 8%, isang magandang balita naman aniya na lumagpak sa 4.5 ang porsiyento ang mga walang hanapbuhay.
Ipagpapatuloy aniya ng kanyang administrasyon na palakasin ang kampanya na may kinalaman sa trabaho habang kasabay nito’y ang paghahanap ng kaparaanan upang mabawasan ang impact sa pagtaas sa presyo ng mga pangunahing bilihin.
- Latest