2 bebot itinumba sa boarding house
MANILA, Philippines — Dalawang babae na namatay noon din matapos pagbabarilin ng hindi nakikilalang lalaki na pumasok sa kanilang boarding house sa Sitio Laluses, Barangay Talisay, Tiaong, Quezon, kamakalawa ng gabi.
Ang dalawang biktima na nagtamo ng mga tama ng bala ng baril sa iba’t ibang bahagi ng katawan ay nakilalang sina Jessica Tambado, 28 at Lanie Caya, 26.
Sa ulat, alas-10:40 ng gabi habang nakahiga ang mga biktima sa loob ng nirerentahang boarding house nang pumasok ang hindi nakikilalang lalaki at walang kaabug-abog na sila ay pinagbabaril.
Nang matiyak na patay na ang dalawang babae ay sumakay ang suspek sa isang naghihintay na kulay puting kotse saka tumakas.
Inaalam na ng pulisya ang pagkakakilanlan ng salarin at ang motibo nito sa krimen.- Ed Amoroso
- Latest