Coast Guard napatay ng kabaro
MANILA, Philippines — Hindi na umabot ng buhay sa ospital ang isang tauhan ng Philippine Coast Guard (PCG) matapos tamaan ng bala mula sa baril ng kabaro na aksidente umanong pumutok sa loob ng Coast Guard Station na matatagpuan sa Brgy. Manjumlad, Matnog, Sorsogon, kamakalawa ng hapon.
Kinilala ang nasawi na si SN1 Joshua L. Solano, 24-anyos, binata, residente ng Camalig, Albay.
Habang sumuko naman ang nakabaril na kabaro na si SN2 John Klent Nacario Lumabe, 29-anyos, binata at residente ng Brgy. Lourdes Young, Nabua, Camarines Sur.
Sa ulat, alas-4:45 ng hapon naka-duty umano sa queuing area ng PCG ang suspek nang sa hindi pa malamang dahilan ay biglang aksidenteng pumutok ang kanyang Kalibre.9mm na baril dahilan para masapol ang biktima.
Duguang humandusay ang biktima na agad isinugod sa pagamutan pero idineklarang dead-on-arrival.
Patuloy ang ginagawang imbestigasyon ng mga otoridad sa insidente habang nasa kustodiya ng pulis ang suspek at ang kanyang service firearm.
- Latest
