Kelot inutas ng karibal
MANILA, Philippines — Dead on the spot ang 24-anyos na binata nang pagbabarilin sa loob ng kanyang bahay kahapon ng umaga sa Baseco Compound, Port Area, Maynila.
Ang nasawi ay kinilalang si Marco Polo Aquino, jobless ng Blk.1 Gasangan, Baseco Compound.
Pinaghahanap naman ng mga operatiba ang gunman at dalawa nitong look-out sa isinagawang krimen.
Ayon sa ulat ng Manila Police District - Homicide Section, alas-10:30 ng umaga nang pasukin ng gunman ang biktima sa loob ng kanyang bahay saka ito pinagbabaril. Mabilis din itong tumakas matapos ang insidente bitbit ang ginamit na caliber 40.
Lumalabas sa imbestigasyon, dati umanong kinakasama ng biktima ang kasalukuyang live-in partner ng gunman.
Sa kabila nito, patuloy pa rin umanong nagpupunta ang babae kay Aquino na ikinagalit ng suspek kaya sumugod ito sa bahay ng biktima saka pinaulanan ng bala.
Nakuha sa crime scene ang limang basyo ng bala at isang hindi pumutok na bala ng nasabing kalibre.
Patuloy ang imbestigasyon ng pulisya sa krimen habang hindi pa tinukoy ang pagkakilanlan ng gunman.
- Latest
