‘Bida’ kontra ilegal na droga, inilunsad
MANILA, Philippines — Para sa mas pinaigting na kampanya ng pamahalaan laban sa illegal na droga sa bansa, inilunsad na kahapon ang “Buhay Ay Ingatan, Droga’y Ayawan” o BIDA program.
Nabatid na sa ilalim ng BIDA program, makikipagtulungan ang mga local government units (LGUs), national government agencies, at iba pang pangunahing sektor ng lipunan, sa mga drug enforcement agencies kabilang ang Philippine National Police (PNP), Philippine Drug Enforcement Agency (PDEA), National Bureau of Investigation (NBI) at iba pang ahensya, upang mabawasan ang demand sa ilegal na droga at magkaroon ng rehabilitasyon sa mga komunidad.
Isinagawa ang national launching ng programa sa Quezon Memorial Circle sa pangunguna ni Interior and Local Government Secretary Benjamin ‘Benhur’ Abalos Jr., na nagsabing ang problema sa ilegal na droga ay dapat na solusyunan mula sa ugat nito.
“Ang kapulisan natin, nandito ang mga generals, mga colonels, nandito PDEA, Dangerous Drugs Board, NBI, walang ginawa kundi manghuli nang manghuli. Makikita niyo, kaliwa’t kanan ang huli ever since. Pero anong nangyayari? May pumapalit lang kung minsan,” aniya pa. “Kaya ang kailangan natin dito, hindi lang ang panghuli ng ating mga kapulisan, PDEA, NBI. Tulungan ng buong bayan, ugatin natin ang problema.
Sinabi ni Abalos na ang BIDA program ay makikipagtulungan sa mga barangays, simbahan at religious communities, at mga pamilya upang matugunan ang problema sa ilegal na droga at maisailalim sa rehabilitasyon ang mga taong lulong dito.
Ang Department of Social Welfare and Development (DSWD) at ang Department of Health (DOH) aniya ang tutulong sa kanilang rehabilitation programs habang ang mga church leaders naman aniya ay maaaring magbigay ng gabay sa mga drug addicts at drug pushers na nais magbagong-buhay.
Ang Department of Trade and Industry (DTI) naman ang inaasahang magkakaloob ng programang pangkabuhayan sa kanila habang ang Department of Labor and Employment (DOLE) naman ang tutulong upang makahanap sila ng trabaho.
- Latest
