DOH: State of calamity sa COVID-19 palawigin pa
MANILA, Philippines — Inirekomenda ng Department of Health (DOH) na palawigin pa ang state of calamity para sa COVID-19 para maipagpatuloy ang pandemic response ng pamahalaan.
Ayon kay DOH Officer-in-Charge Maria Rosario Vergeire, hihingi sila ng extension ng state of calamity ng hindi bababa sa isa o dalawang buwan, kung hindi maisasabatas ang Center for Disease Control (CDC) bill bago matapos ang taon.
“If this bill will not be enacted by the end of the year, that is the time we need to consider if we will request from the Office of the President another extension of the state of calamity even for just one or two months only,” ani Vergeire sa press briefing noong Biyernes.
Gayunman, aniya, sakaling maisabatas na ang CDC bill, hindi na kailangan ang pagpapalawig sa state of calamity.
Sa kasalukuyan, ang mga local government at ang national government ay kaya namang pamahalaan, na kailangan na lamang ang deklarasyon mula sa Pangulo dahil sa mga konsiderasyon na nabanggit.
Una nang nagpahayag ang Private Hospital Association of the Philippines Inc. (PHAPI) na may pangangailangan na palawigin ang state of calamity kahit hanggang first quarter ng 2023.
Hanggang sa Disyembre 31, 2022 na lamang ang state of calamity ng COVID-19 pandemic nang palawigin ito ni Pangulong Ferdinand “Bongbong” Marcos Jr.
- Latest
